බැඳුම්කර කොමිසමට STF ආරක්ෂාව: පර්පෙචුවල් සමාගම සැඟවූ රහස්‌ අද එළියට?

බැඳුම්කර කොමිසමේ ආරක්ෂාව සඳහා පොලිස් විශේෂ කාර්ය බළකාය යොදවා ඇතැයි වාර්තා වෙයි.

බැඳුම්කර කොමිසම අවසන් අවස්ථාවේ ඇති බවත් එහි වැදගත් ලේඛන ඇති බවත් දැනුම් දෙමින් කොමිසමට විශේෂ ආරක්ෂාව සලසන ලෙස කොමිසම විසින් කරන ලද ඉල්ලීමකට අනුව එයට පොලිස් විශේෂ කාර්ය බළකායේ ආරක්ෂාව ලබාදී ඇතැයි වාර්තා වේ.

මේ අතර එම කොමිසමේ ආරංචි මාර්ග පවසන්නේ පර්පෙචුවල් ට්‍රෙෂරීස්‌ සමාගම විසින් දුරකථන ඇමතුම් දත්ත මකා දමා සැඟවීමට උත්සාහ කළ භාණ්‌ඩාගාර බැඳුම්කර වෙන්දේසිවල ලංසු ඉදිරිපත් කිරීමට අදාළ තොරතුරු රැසක්‌ අද (06) බැඳුම්කර කොමිසමේදී නීතිපති දෙපාර්තමේන්තුව විසින් මුල්වරට හෙළිදරව් කිරීමට නියමිත බවයි.

මෙලෙස අනාවරණය වන්නේ පර්පෙචුවල් ට්‍රෙෂරීස්‌ සමාගම විසින් පටිගත කළ දුරකථන ඇමතුම් දත්ත මකා දමා පසුව එම ඇමතුම් දත්ත ගබඩා කර තිබූ පරිගණක යන්ත්‍රය පවා විනාශ කර ජනාධිපති බැඳුම්කර කොමිසමට මෙතෙක්‌ සැඟවූ සත්‍යය බව ද එම ආරංචි මාර්ග පැවසී ය.

මෙම දුරකථන සංවාදවලට සවන්දීමෙන් පසු ඇතැම් ප්‍රශ්නගත භාණ්‌ඩාගාර බැඳුම්කර වෙන්දේසිවලදී පර්පෙචුවල් ට්‍රෙෂරීස්‌ සමාගම විසින් බැඳුම්කර ලංසු ඉදිරිපත් කිරීමට අදාළ තොරතුරු රැසක්‌ හෙළිදරව් වී ඇතැයි ද එසේම ඒ අතර මහ බැංකුවේ අභ්‍යන්තර තොරතුරු පිටවීම සහ මිල සංවේදී තොරතුරු පිටවීම පිළිබඳ තොරතුරු පවතින බව ද එම ආරංචි මාර්ග පෙන්වා දෙයි.

පර්පෙචුවල් ට්‍රෙෂරීස්‌ සමාගමේ හිමිකරු අර්ජුන් ඇලෝෂියස්‌ මහතා සහ එම සමාගමේ ප්‍රධාන විධායක නිලධාරි කසුන් පලිසේන මහතා අතර මෙම දුරකථන සංවාද සිදුව ඇති බව ද වාර්තා වේ.

මේ අනුව අද දින කොමිසමේ සාක්‍ෂි විභාගය අතරතුරදී එම දුරකථන සංවාද තොරතුරු රජයේ නීතිපති දෙපාර්තමේන්තුව විසින් බැඳුම්කර කොමිසමට ඉදිරිපත් කරනු ඇතැයි ද එම ආරංචි මාර්ග හෙළි කරයි.

පර්පෙචුවල් ට්‍රෙෂරීස්‌ සමාගමේ තොරතුරු තාක්‍ෂණ ප්‍රධානී සචිත් දේවතන්ත්‍රි මහතාගේ සාක්‍ෂියේදී පර්පෙචුවල් ට්‍රෙෂරීස්‌ සමාගමේ දුරකථන ඇමතුම් පටිගත කිරීමේ පද්ධතියෙන් ඇතැම් තෝරාගත් දුරකථන ඇමතුම් මකා දමන ලද බව හෙළිදරව් වූ අතර එසේ මකා දැමූ දුරකථන සංවාද සී ඩී පට හතරක සමාගම් ප්‍රධාන අලෙවිකරු නුවන් සල්ගාදු භාරයේ ඇති බව ද සචිත් දේවතන්ත්‍රි කොමිසමට හෙළි කළේය.

ඒ අනුව කොමිසමේ නියෝගය පරිදි නුවන් සල්ගාදු විසින් එම සී ඩී පට කොමිසමට භාරදීම පෙරේදා (4) සිදුවිය. ඉන්පසු ඊයේ (5) සවස සිට එම දුරකථන සංවාදවලට සවන්දීම කොමිසමේ විමර්ශන නිලධාරීන් විසින් අරඹනු ලැබීය.

Leave your comment